Шинэ сэргэлтийн бодлогод тусгагдсан Боомтын сэргэлтийн хүрээнд “Монголын төмөр зам” ТӨХК нь төмөр замын төслийн бүтээн байгуулалтын ажлуудыг цогцоор гүйцэтгэж байна. Засгийн газрын 446 дугаар тогтоолоор “Шивээхүрэн-Сэхээ, Бичигт-Зүүнхатавч боомтын хил дамнасан төмөр замын төслийг хэрэгжүүлэх эрхийг “Монголын төмөр зам” ТӨХК-д олгосон. Монгол Улс, БНХАУ хоорондын зам харилцааг харилцан ашигтай, оновчтой байдлаар зохион байгуулах, уул уурхайн бүтээгдэхүүний төмөр замын тээвэрлэлтийн гарцыг нэмэгдүүлэх замаар хилийн боомтын үйл ажиллагааг өргөжүүлэх хоёр улсын төрийн бодлогын хүрээнд “Шивээхүрэн Сэхэ хилийн боомтын төмөр замын талаар авах зарим арга хэмжээний тухай” Засгийн газрын 2018 оны 08 оны дугаар сарын 01-ний өдрийн 232 дугаар тогтоолоор “Монголын төмөр зам ТӨХК-д тавин нэгээс доошгүй эзэмшүүлж “Шивээхүрэн төмөр зам” ХХК-ийг байгуулах, бүтээн байгуулалтын ажлыг эхлүүлэхээр шийдвэрлэсэн байдаг. Засгийн газрын 2023 оны 05 дугаар сарын 17-ны өдрийн хуралдаанаар Шивээхүрэн-Сэхээ чиглэлийн төмөр замын суурь бүтцийг барих тусгай зөвшөөрлийг “Нарийнсухайт төмөр зам” компанид олголоо. Ийнхүү энэ өдөр Шивээхүрэн-Сэхээ боомтын хил дамнасан төмөр замын төслийн ажлыг эхлүүлж буй түүхэн үйл явдал тохиож байна. Шивээхүрэн-Сэхээ боомтын хил дамнасан төмөр замын гол замын урт 7,7 км, дэлгэмэл урт нь 19,3 км байх бөгөөд 1 өртөөтэй, 2 дугаар зэрэглэлийн, нарийн царигтай барихаар төлөвлөсөн. “Монголын төмөр зам” ТӨХК нь тус төмөр замын бүтээн байгуулалтын бэлтгэл ажлын хүрээнд Шивээхүрэн-Сэхээ боомтын төмөр замын бүтээн байгуулалтад шаардлагатай инженер-геодези, инженер-геологи, геотехник, гидрологийн судалгааны ажлуудыг бүрэн дуусгасан. Тус боомтын төмөр замын нарийвчилсан зураг төслийг боловсруулах ажлыг БНХАУ-ын “CRDC корпораци” гүйцэтгэсэн ба “Монголын төмөр зам” ТӨХК ТЭЗҮ-ийг боловсруулан ЗТХЯ-ны Шинжлэх ухаан, технологийн зөвлөлөөр энэ сарын 19-ний өдөр хэлэлцүүлэн, зөвлөмжүүдийн дагуух ажлуудыг гүйцэтгэж байна.